कुमारी बैंकले आर्थिक वर्ष २०८१/८२ को चौथो त्रैमाससम्मको वित्तीय विवरण सार्वजनिक गरेको छ। विवरण अनुसार, बैंकले सो अवधिमा २ अर्ब ११ करोड ६४ लाख रुपैयाँ खुद नाफा कमाएको छ, जुन अघिल्लो वर्षको तुलनामा ४५ हजार प्रतिशतभन्दा धेरैले वृद्धि हो। अघिल्लो वर्ष सोही अवधिमा बैंकको खुद नाफा मात्र ४६ लाख ८ हजार रुपैयाँ थियो।
बैंकको खुद ब्याज आम्दानी ६.९५ प्रतिशतले बढेर ११ अर्ब ५५ करोड ४३ लाख रुपैयाँ पुगेको छ। त्यस्तै, सञ्चालन नाफा ५२९ प्रतिशतले बढेर ६ अर्ब १३ करोड रुपैयाँ पुगेको छ। बैंकले सम्भावित जोखिमको लागि छुट्याएको इम्पेयरमेन्ट चार्ज ६ अर्ब ८४ करोडबाट घटेर २ अर्ब ७९ करोडमा सीमित भएको छ। ब्याज आम्दानीको वृद्धि र इम्पेयरमेन्ट चार्जको गिरावटले नाफा वृद्धिमा मुख्य भूमिका खेलेको देखिन्छ। तर, यस अवधिमा वितरणयोग्य नाफा भने २ अर्ब ७९ करोड रुपैयाँ ऋणात्मक रहेको छ, जसका कारण बैंकले लाभांश वितरण गर्न नसक्नेछ।
कम्पनीको चुक्ता पुँजी २६ अर्ब २२ करोड रुपैयाँ रहेको छ। सो अवधिसम्ममा बैंकले ३ खर्ब ६४ अर्ब रुपैयाँ निक्षेप संकलन गरेको छ भने २ खर्ब ६० अर्ब रुपैयाँ कर्जा प्रवाह गरेको छ। प्रति शेयर आम्दानी (EPS) ८.०७ रुपैयाँ पुगेको छ भने प्रति शेयर नेटवर्थ १४२.१९ रुपैयाँ रहेको छ। यद्यपि, खराब कर्जाको अनुपात ५.९६ प्रतिशतबाट बढेर ६.४२ प्रतिशत पुगेको छ।
