काठमाडौं । आज पनि शेयर बजार दोहोरो अंकले घटेर बन्द भएको छ। नेपाल स्टक एक्सचेन्ज (नेप्से) परिसूचक आज ४१.७८ अंकले घटेर २,८३३ विन्दुमा झरेको छ। आज ३२५ कम्पनीका २ करोड २२ लाख ७ हजार १२ कित्ता शेयर किनबेच हुँदा कुल कारोबार रकम ९ अर्ब ३३ करोड रुपैयाँ नाघेको छ।
शेयर कारोबारमा आज सबैभन्दा अगाडि हिमालयन रिइन्स्योरेन्स रहेको छ, जसको ३९ करोड २८ लाख रुपैयाँ बराबरको कारोबार भएको छ। त्यस्तै ट्रेड टावर कम्पनीको ३७ करोड र शिवम् सिमेन्टको ३३ करोड २८ लाख रुपैयाँको कारोबार भएको छ। आज ४६ कम्पनीको शेयर मूल्य बढ्दा २०४ कम्पनीको शेयर मूल्य घटेको छ।
सबैभन्दा बढी कमाउने कम्पनीहरूमा समाज लघुवित्त र उन्नती सहकार्य लघुवित्त रहेका छन्, जसका लगानीकर्ताले १० प्रतिशतका दरले लाभ कमाएका छन्। त्यसैगरी वि नेपाल लघुवित्त र सिर्जनशील लघुवित्तका लगानीकर्ताले करिब ४ प्रतिशतले मुनाफा कमाएका छन्। विपरित रूपमा, सबैभन्दा धेरै घाटा व्यहोर्ने कम्पनी थ्रि स्टार हाइड्रोपावर रहेको छ, जसका लगानीकर्ताले १० प्रतिशतका दरले मूल्य गुमाएका छन्।
