काठमाडौँ । अन्तर्राष्ट्रिय मुद्रा कोष (आईएमएफ) को सर्तअनुसार नेपालका १० वाणिज्य बैंकको पूर्ण लेखा परीक्षण गर्न लागिएको छ, जसमा करिब ४ करोड ३५ लाख रुपैयाँ खर्च हुने भएको छ। नेपाल राष्ट्र बैंकले उक्त कार्यका लागि बंगलादेशको लेखा परीक्षण फर्म ‘हाउलादार युनुस एन्ड कम्पनी’लाई छनोट गरेको छ। यसअघि सुरु गरिएको लेखा परीक्षण प्रक्रिया असफल भएपछि पुस २०८१ देखि दोस्रोपटक प्रक्रिया थालिएको थियो, जुन अब अन्तिम चरणमा पुगेको छ।
राष्ट्र बैंकले १९ फागुन २०८१ मा प्राप्त आवेदनका आधारमा डेलोइट श्रीलंका, केपीएमजी भारत, एमएसके एन्ड एसोसिएट्स, र अन्य फर्महरूमध्येबाट उत्कृष्ट प्रस्ताव बुझाउने हाउलादार युनुस एन्ड कम्पनीलाई छनोट गरेको हो। उक्त फर्मले ४ करोड ३५ लाख बराबरको प्रस्ताव पेस गरेको थियो, जुन राष्ट्र बैंकले स्वीकृत गरिसकेको छ। अब सात दिनभित्र दाबी विरोध नपरेमा लेखा परीक्षण कार्य सुरु हुनेछ।
राष्ट्र बैंक स्रोतका अनुसार लेखा परीक्षणका लागि २२ जना विशेषज्ञ र २ जना बैंकका कर्मचारी खटाइनेछ। हरेक बैंकमा ४ जनाको टोली रहनेछ। कर्जा डिफल्ट र इभर ग्रिनिङजस्ता मुद्दाहरूमा केन्द्रित रहेर यो परीक्षण हुनेछ। आईएमएफले नेपाली बैंकहरूमा कर्जाको गुणस्तरमा गम्भीर आशंका गर्दै आएको थियो, जसका कारण लेखा परीक्षणसँगै चालु पूँजी कर्जा मार्गदर्शन पनि लागू गरिएको हो।
