काठमाडौं । नेपाली शेयर बजार आज तीव्र उतारचढावका बीच उकालो लाग्दै सकारात्मक रूपमा बन्द भएको छ। नेप्से परिसूचक ५.१४ अंकले बढेर २,९७८ बिन्दुमा कायम भएको छ। आजको दिन ९८ कम्पनीको शेयर मूल्य बढ्दा १५२ कम्पनीको शेयर घटेको छ। कुल ३१९ कम्पनीको ४ करोड ४८ लाख ६६ हजार १५९ कित्ता शेयर किनबेच हुँदा कारोबार रकम १९ अर्ब ५७ करोड रुपैयाँ नाघेको छ।
कारोबार रकमका आधारमा हिमालयन रिइन्स्योरेन्स अग्रस्थानमा रह्यो, जसको ७८ करोड १० लाख रुपैयाँ बराबरको शेयर कारोबार भयो। त्यसपछि शिवम् सिमेन्ट (७५ करोड २९ लाख), नेपाल इन्फ्रास्ट्रक्चर बैंक—निफ्रा (६२ करोड ३३ लाख) र बुटवल पावर कम्पनी (६२ करोड २५ लाख) क्रमशः अगाडि रहे। लगानीकर्ताले सर्वाधिक मुनाफा कमाएका कम्पनीहरूमा ट्रेड टावर र सान्भी इनर्जी छन्, जसले ९.९९ प्रतिशतको वृद्धिदर देखाए। त्यस्तै, ग्रिन भेञ्चर (९.४०%) र लिबर्टी इनर्जी (७%) का लगानीकर्ताले पनि उल्लेख्य लाभ कमाएका छन्।
यता, सबैभन्दा धेरै घाटा व्यहोर्नुपरेको कम्पनी भुगोल इनर्जी हो, जसका लगानीकर्ताले आज ५.३२ प्रतिशतको ह्रास व्यहोरेका छन्।
