काठमाडौं । भौतिक पूर्वाधार तथा यातायात मन्त्रालयले आर्थिक वर्ष २०८१/८२ मा सडक तथा पुल निर्माणमा उल्लेख्य प्रगति हासिल गरेको छ। मन्त्रालयले ९३० किलोमिटर सडक कालोपत्रे गर्ने लक्ष्य राखेकोमा ९३२ किलोमिटर कालोपत्रे गरिएको तथा १५० पुल निर्माण गर्ने लक्ष्यका विरुद्धमा १०५ पक्की पुल र १० बेलीब्रिज निर्माण सम्पन्न गरेको जनाएको छ। मन्त्री देवेन्द्र दाहालका अनुसार विगत ६ वर्षको तुलनामा यो वर्ष सबैभन्दा धेरै ७६.४१ प्रतिशत पुँजीगत खर्च भएको छ। साथै, राष्ट्रिय सडक सञ्जालमार्फत सबै जिल्लामा यातायात पहुँच सुनिश्चित गरिएको छ, जसमा हुम्लाको सदरमुकाम सिमकोट पनि समावेश छ।
मन्त्री दाहालले मन्त्रालयमा आयोजना गरेको पत्रकार सम्मेलनमा रुग्ण आयोजना व्यवस्थापनलाई प्राथमिकता दिइएको, समिति गठन गरेर समस्या समाधान गरिएकाले अलपत्र आयोजना संख्या घटेको बताए। सवारी चालक अनुमतिपत्रमा क्यूआर कोड वा इलेक्ट्रोनिक चिप्स समावेश गर्न नियमावली संशोधन गरिएको र ललितपुरको ग्वार्कोमा फ्लाईओभर निर्माण सम्पन्न भएको जानकारी पनि दिएका छन्। साथै, अघिल्लो वर्षका विकास आयोजनाहरूमा सिर्जना भएको ८ अर्ब ६६ करोड दायित्व दोस्रो त्रैमासभित्रै भुक्तानी गरिएको र प्रमुख सुरुङमार्ग योजनाहरू – नागढुंगा र सिद्धबाबा – मा निर्माण कार्य तीव्र गतिमा अघि बढिरहेको मन्त्रालयले जनाएको छ।
