सान्भि इनर्जी लिमिटेडले आज (जेठ ९ गते) देखि सर्वसाधारणका लागि प्रारम्भिक सार्वजनिक निष्काशन (आईपीओ) खुला गरेको छ। कम्पनीले प्रतिकित्ता १०० रुपैयाँ अंकित मूल्यमा २४ लाख १५ हजार ३०० कित्ता साधारण शेयर निष्काशन गर्दैछ, जसको कुल मूल्य २४ करोड १५ लाख ३० हजार रुपैयाँ बराबर हुन्छ। यसअघि आयोजना प्रभावित क्षेत्रका स्थानीय बासिन्दा, वैदेशिक रोजगारीमा रहेका नेपालीहरू, सामूहिक लगानी कोष र कर्मचारीका लागि छुट्याइएको शेयरको बाँडफाँट भइसकेको छ। आवेदन न्यूनतम १० कित्ताबाट गर्न सकिनेछ भने अधिकतम २० हजार कित्तासम्मका लागि गर्न पाइनेछ। निष्काशन छिटोमा जेठ १३ र ढिलोमा जेठ २३ गतेसम्म खुला रहनेछ।
कम्पनीले विकास गरिरहेको ७.६ मेगावाट क्षमताको जोगमाई खोला जलविद्युत आयोजना र ५.२ मेगावाटको जोगमाई क्यासकेड आयोजनाको लागत क्रमशः १ अर्ब ५७ करोड र १ अर्ब ९१ लाख रुपैयाँ रहेको छ। दुवै आयोजनामा साधारण लगानी फिर्ता हुने अवधि ५.५३ र ६.७३ वर्ष रहेको छ भने डिस्काउण्टमा लगानी फिर्ता हुने अवधि क्रमशः ८.२९ र ११.१० वर्ष छ। कम्पनीलाई केयर रेटिङ्ग्स नेपालले “CARE-NP BB+” इस्यूअर रेटिङ्ग प्रदान गरेको छ, जसले औसत स्तरको जोखिम संकेत गर्दछ। शेयर निष्काशन तथा बिक्री प्रबन्धक नेपाल एसबिआई मर्चेन्ट बैंकिङ लिमिटेड रहेको छ र लगानीकर्ताले सि–आस्बा प्रणालीमार्फत आवेदन दिन सक्नेछन्।
