काठमाडौं । हिमालयन रिइन्स्योरेन्स लिमिटेडको लाभांश सुनिश्चित गर्न आज (वैशाख ८ गते) अन्तिम दिन रहेको छ। कम्पनीले जेठ ११ गते बुक क्लोज गर्ने निर्णय गरेकाले आजसम्म शेयरधनी बनेका लगानीकर्ताले प्रस्तावित लाभांश प्राप्त गर्न सक्नेछन्।
नेपाल स्टक एक्सचेञ्जले जानकारी दिएअनुसार, जेठ ९ र १० गते शेयर बजार बन्द हुने भएकाले आजसम्म सेयर खरीद गरेमा मात्र लगानीकर्ताले लाभांशसहित कम्पनीको आगामी वार्षिक साधारणसभामा भाग लिन सक्नेछन्। कम्पनीको ११औं वार्षिक साधारणसभा जेठ २५ गते बिहान ११ बजे प्रज्ञा प्रतिष्ठान, कमलादी, काठमाडौंमा आयोजना हुने तय गरिएको छ। सभामा आर्थिक वर्ष २०८०/८१ का लागि हालको चुक्ता पुँजी १० अर्ब ४० करोड रुपैयाँको आधारमा ४.५० प्रतिशत बोनस शेयर र कर प्रयोजनका लागि ०.२४ प्रतिशत नगद लाभांशसहित कुल ४.७४ प्रतिशत लाभांश वितरण गर्ने प्रस्ताव पेश गरिनेछ।
त्यसैगरी, सभामा लेखापरीक्षकसहितको अघिल्लो आर्थिक वर्षको वार्षिक प्रतिवेदनमाथि छलफल गरी पारित गरिनेछ। साथै, चालू आर्थिक वर्षका लागि नयाँ लेखापरीक्षक नियुक्त गर्ने र उनको पारिश्रमिक तोक्ने, सामाजिक उत्तरदायित्व अन्तर्गत कम्पनीले गरेको खर्च अनुमोदन गर्ने लगायतका प्रस्तावहरू पनि पेस गरिनेछन्। सभाले कम्पनीको प्रबन्धपत्र तथा नियमावली संशोधन गर्न सञ्चालक समितिलाई आवश्यक अधिकार प्रदान गर्ने प्रस्तावसमेत पारित गर्ने कार्यक्रम रहेको छ।
