काठमाडौं । नेपाल धितोपत्र बोर्डले दुई बैंकलाई ऋणपत्र (डिबेन्चर) निष्कासनको अनुमति दिएको छ। नेपाल एसबीआई बैंक र शाइन रेसुंगा डेभलपमेन्ट बैंकलाई आज बोर्डले ऋणपत्र जारी गर्न स्वीकृति दिएको हो।
नेपाल एसबीआई बैंकले ‘नेपाल एसबीआई बैंक डिबेन्चर’ नामक ऋणपत्रमार्फत ३ अर्ब रुपैयाँ संकलन गर्नेछ। बैंकले १ हजार रुपैयाँ अंकित दरमा ३० लाख इकाइ बिक्री गर्नेछ, जसमा १८ लाख इकाइ व्यक्तिगत तबरबाट र १२ लाख इकाइ सर्वसाधारणका लागि निष्कासन गरिनेछ। १० वर्षे अवधिको यो ऋणपत्रमा वार्षिक ७ प्रतिशत ब्याज प्रदान गरिनेछ। यस ऋणपत्रको बिक्री प्रबन्धक नबिल इन्भेस्टमेन्ट बैंकिङ लिमिटेड रहेको छ।
त्यस्तै, शाइन रेसुंगा डेभलपमेन्ट बैंकले पनि १ अर्ब रुपैयाँ बराबरको ‘शाइन रेसुंगा डिबेन्चर’ जारी गर्नेछ। यस अन्तर्गत १ हजार रुपैयाँ अंकित दरका १० लाख इकाइ बिक्री हुनेछन्, जसमा ६ लाख इकाइ व्यक्तिगत तबरबाट र बाँकी ४ लाख इकाइ सर्वसाधारणलाई लक्षित गरिनेछ। १० वर्षे अवधिको उक्त ऋणपत्रमा लगानीकर्ताले वार्षिक ८ प्रतिशत ब्याज पाउनेछन्। यस डिबेन्चरको बिक्री व्यवस्थापन एनआईएमबी एस क्यापिटलले गर्नेछ।
यी दुवै ऋणपत्र निष्कासनले बैंकहरूको दीर्घकालीन पूँजी संरचना सुदृढ गर्ने विश्वास गरिएको छ।
