काठमाडौँ। प्रधानमन्त्री केपी शर्मा ओलीले नयाँ वर्ष २०८२ को अवसरमा शुभकामना सन्देश दिँदै निराशा फैलाएर मुलुकलाई गलत दिशामा लैजान खोज्ने प्रवृत्तिलाई परास्त गर्नुपर्ने बताएका छन्। उनले युवाहरूलाई उद्यमशीलता, प्रविधि, शिक्षा र स्वरोजगारमार्फत आत्मनिर्भर र आत्मविश्वासी बनाउने सरकारको नीति उल्लेख गर्दै राष्ट्र निर्माणमा उनीहरूको सक्रिय सहभागिता आवश्यक भएको बताए।
जातीय, क्षेत्रीय, सांस्कृतिक र धार्मिक विविधता देशको साझा सम्पत्ति भएको उल्लेख गर्दै प्रधानमन्त्री ओलीले एकता, सद्भाव र सहिष्णुताको आधारमा मात्रै देश अगाडि बढ्न सक्ने विश्वास व्यक्त गरे। उनले लोकतान्त्रिक प्रणालीले ल्याएको परिवर्तनलाई अँगाल्दै वातावरणीय संरक्षणलाई पनि प्राथमिकता दिनुपर्ने बताए। नयाँ वर्षले नेपाली जनताको जीवनमा शान्ति, समृद्धि, प्रगति र सन्तोष ल्याओस् भन्ने शुभकामना व्यक्त गर्दै सबैमा आशा, उत्साह र सकारात्मक सोचका साथ अघि बढ्न प्रेरणा मिलोस् भन्ने कामना गरे।
