काठमाडौं। प्रधानमन्त्री केपी शर्मा ओलीले नेपाली समाजका पूर्वजहरू विश्वमा ज्ञान फैलाउन अग्रणी रहेको उल्लेख गर्दै वर्तमान नेपालीहरूमा छिटो सिक्ने क्षमता भएको बताए। शनिबार आयोजित ‘एनसेल बाह्रखरी गल्फ तथा आर्थिक परिसंवाद’ कार्यक्रममा बोल्दै प्रधानमन्त्री ओलीले हाम्रा पुर्खाहरूले प्राचीन समयमा हरेक क्षेत्रको विकासमा अग्रसर भूमिका खेलेको स्मरण गर्दै अहिले पनि ती गुणहरू नेपालीमा विद्यमान रहेको बताए। उनले भने, "हामीले पनि पुर्खाले गरेकोजस्तो गर्नुपर्छ भन्ने सोच विकासको बाधक बन्छ, तर हामीसँग सिक्न सक्ने जिन छ।"
प्रधानमन्त्री ओलीले समाजमा केही नकारात्मक पक्षहरू भए पनि सकरात्मकता खोज्नु अहिलेको आवश्यकता भएको बताए। उनले प्राकृतिक स्रोतसाधन, भूगोल र खनिजको दृष्टिकोणले नेपाल धनी देश भएको उल्लेख गर्दै अबको मार्ग सकारात्मक सम्भावनाको खोजीमा हुनु पर्ने बताए। साथै, उनले नेपालमा हाल ६० प्रतिशत सक्रिय जनसंख्या र ४० प्रतिशत युवा जनसंख्या रहेको भन्दै यदि त्यसको सदुपयोग गरिएन भने युवा लाभ गुम्ने खतरा रहेको चेतावनी पनि दिए।
