काठमाडौँ। नेपाल विद्युत प्राधिकरणका निवर्तमान कार्यकारी निर्देशक कुलमान घिसिङले आफूलाई सरकारबाट पदमुक्त गरिएकोप्रति गम्भीर आपत्ति जनाएका छन्। शुक्रबार पत्रकार सम्मेलन गर्दै घिसिङले देश र जनताको सेवामा निष्ठापूर्वक खटिँदा समेत इज्जतमाथि आघात पुग्ने गरी बर्खास्त गरिएको गुनासो गरे। उनले राष्ट्र निर्माणमा जहाँ आवश्यक पर्छ, सधैँ खटिन तयार रहेको उल्लेख गर्दै आफूलाई हटाइनु अन्यायपूर्ण भएको धारणा राखे।
घिसिङले उद्योगहरूको ट्रंक र डेडिकेटेड लाइनको बक्यौता उठाउन पत्र काट्नु नै आफ्नो बर्खास्तीको प्रमुख कारण भएको दाबी गरे। ‘बक्यौता उठाउनु अपराध हो?’ भन्दै उनले प्रश्न गर्दै राज्यको सम्पूर्ण शक्ति आफूविरुद्ध कसको स्वार्थमा प्रयोग गरियो भन्ने कुरा अब जनताले देखिसकेको बताए। आफूसँग कुनै व्यक्तिगत स्वार्थ नरहेको स्पष्ट पार्दै उनले आफू सधैँ जनताको सेवामा समर्पित रहेको बताए।
