काठमाडौँ । विश्व बैंकले नेपालमा आर्थिक सुधारको संकेत देखिएको जनाएको छ। बिहीबार सार्वजनिक गरिएको नेपाल विकास प्रतिवेदन अनुसार, आर्थिक वर्ष २०२४/२५ मा नेपालको अर्थतन्त्र ४.५ प्रतिशतले वृद्धि हुने प्रक्षेपण गरिएको छ। यो अघिल्लो आर्थिक वर्ष २०२३/२४ को ३.९ प्रतिशत वृद्धिदरको तुलनामा उच्च हो।
प्रतिवेदनका अनुसार, आर्थिक वृद्धिको मुख्य कारक आन्तरिक व्यापार, जलविद्युत् तथा धान उत्पादनको वृद्धि हुने अपेक्षा गरिएको छ। साथै, सन् २०२५/२६ र २०२६/२७ मा नेपालको अर्थतन्त्रले औसत ५.४ प्रतिशतको वृद्धिदर हासिल गर्ने अनुमान गरिएको छ, जसमा सेवा क्षेत्रको योगदान महत्त्वपूर्ण हुने बताइएको छ।
विश्व बैंकका माल्दिभ्स, नेपाल र श्रीलंकाका लागि राष्ट्रिय विभागीय निर्देशक डेभिड सिसलेनले नेपालमा निजी क्षेत्रको अगुवाइमा आर्थिक वृद्धिलाई प्रवर्द्धन गर्नुपर्ने आवश्यकता औंल्याएका छन्। उनका अनुसार, "नेपालले आफ्नै उत्थानशीलताका इतिहासलाई आधार बनाएर संरचनागत सुधार कार्यान्वयन गर्नु आवश्यक छ।"
प्रतिवेदनले नेपालको अर्थतन्त्रमा रहेका सम्भावित जोखिमहरूको पनि उल्लेख गरेको छ। त्यसमा भू-राजनीतिक तथा व्यापारसम्बन्धी अनिश्चितता, वित्तीय क्षेत्रमा ऋणको गुणस्तरमा गिरावट, बारम्बार हुने कर्मचारी सरुवाले उत्पन्न गर्ने नीतिगत असंगति, र पुँजीगत बजेट कार्यान्वयनमा हुने ढिलाइ मुख्य चुनौतीका रूपमा देखिएका छन्।
राष्ट्रिय योजना आयोगका उपाध्यक्ष प्रा. डा. शिवराज अधिकारीका अनुसार, "नेपालले १६औं योजना लक्ष्यहरू हासिल गर्न प्रभावकारी पूँजीगत बजेट कार्यान्वयन गर्दै चालु परियोजनाहरू समयमै सम्पन्न गर्नुपर्छ।"
नेपाल डेभलपमेन्ट अपडेट वर्षमा दुईपटक प्रकाशित हुने प्रतिवेदन हो, जसले अघिल्लो आर्थिक वर्षका प्रमुख घटनाक्रमहरूलाई दीर्घकालीन विश्वव्यापी सन्दर्भमा विश्लेषण गर्छ।
