काठमाडौँ । नेपाल राष्ट्र बैंकको पछिल्लो तथ्यांकअनुसार बैंकिङ प्रणालीको कुल निक्षेप संकलन चैत १७ र १८ गतेको अवधिमा ३ अर्ब रुपैयाँले घटेको छ। चैत १७ गते ६७ खर्ब ९० अर्ब रुपैयाँ रहेको निक्षेप भोलिपल्ट ६७ खर्ब ८७ अर्ब रुपैयाँमा सीमित भएको छ।
यही अवधिमा वाणिज्य बैंकहरुको निक्षेप संकलनमा पनि ३ अर्ब रुपैयाँको गिरावट देखिएको छ। चैत १७ गते ६० खर्ब ६३ अर्ब निक्षेप रहेकोमा चैत १८ गते ६० खर्ब ६० अर्बमा झरेको छ। बैंकिङ प्रणालीको कुल कर्जा प्रवाह भने सोही अवधिमा स्थिर देखिएको छ। चैत १७ र १८ दुबै दिन ५४ खर्ब ६८ अर्ब रुपैयाँ बराबरको कर्जा प्रवाह कायम रहेको छ।
तर, वाणिज्य बैंकहरुले प्रवाह गर्ने कर्जामा भने सामान्य गिरावट देखिएको छ। चैत १७ गते ४८ खर्ब ५४ अर्ब रुपैयाँ कर्जा प्रवाह रहेकोमा भोलिपल्ट ४८ खर्ब ५३ अर्ब रुपैयाँमा सीमित भएको छ।
यस अवधिमा अन्तर बैंक ब्याजदर ३ प्रतिशत कायम रहेको छ भने बैंकहरुको औसत सिडी रेसियो ७९.३१ प्रतिशत रहेको राष्ट्र बैंकको तथ्यांकले देखाएको छ।
