काठमाडौँ । आज ६ संसदीय समितिहरूको बैठक बस्ने तय भएको छ। कानुन, न्याय तथा मानव अधिकार समितिको बैठक बिहान ११ बजे केही नेपाल ऐनलाई संशोधन गर्न बनेको विधेयकसम्बन्धी मस्यौदा प्रतिवेदनमाथि छलफल गर्नेछ भने कृषि, सहकारी तथा प्राकृतिक स्रोत समितिले कृषि नीति सम्बन्धी आवश्यक सुझाव संकलन तथा छलफल गर्नेछ।
महिला तथा सामाजिक मामिला समितिको बैठकमा सामाजिक परिचालकहरूको व्यवस्थापन विषयमा छलफल हुनेछ। त्यस्तै, शिक्षा, स्वास्थ्य तथा सूचना प्रविधि समितिको बैठक, साथै विकास, आर्थिक मामिला तथा सुशासन समितिको बैठक पनि बिहान ११ बजे नै बस्नेछ, जहाँ नेपाल अतिकम विकसित राष्ट्रबाट विकासशील राष्ट्रमा स्तरोन्नति गर्ने विषयमा गैरसरकारी संघसंस्था र नागरिक समाजसँग छलफल गरिनेछ।
राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्यांकन समितिको बैठक बिहान साढे ११ बजे बस्नेछ, जसमा नेपाल सरकारको वार्षिक प्रतिवेदन (विद्युत्, खानेपानी, शिक्षा, स्वास्थ्य र पूर्वाधार) सम्बन्धमा छलफल गरिने संसद् सचिवालयले जनाएको छ।
