काठमाडौँ । विन नेपाल लघुवित्त वित्तीय संस्था लिमिटेडले आज (चैत २१ गते) देखि थप सार्वजनिक निष्कासन (एफपीओ) खुला गरेको छ। स्वः पूँजी संरचनामा सर्वसाधारणको ३० प्रतिशत हिस्सेदारी कायम गर्न लघुवित्तले ५१ लाख २९ हजार २५० रुपैयाँबराबरको ५१ हजार २९२.५ कित्ता शेयर निष्कासन गर्न लागेको हो।
लगानीकर्ताले चैत २६ गतेसम्म न्यूनतम १० कित्तादेखि अधिकतम १ हजार कित्तासम्म आवेदन दिन सक्नेछन्। आवश्यक परेमा एफपीओ अवधि बैशाख ४ गतेसम्म लम्बिन सक्छ। क्रेडिट रेटिङ्ग कम्पनी केयर रेटिङ्ग नेपालले लघुवित्तलाई 'केयर एनपी सिंगल बी' इस्यूअर रेटिङ्ग प्रदान गरेको छ, जसले वित्तीय दायित्व बहन गर्ने क्षमतामा उच्च जोखिम रहेको संकेत गर्छ।
एफपीओ निष्कासन तथा बिक्री प्रबन्धक नेपाल एसबिआई मर्चेण्ट बैंकिङ्ग लिमिटेड रहेको छ भने लगानीकर्ताले सि–आस्बा सदस्य बैंक तथा वित्तीय संस्थाहरू वा 'मेरो शेयर' अनलाइन प्रणालीमार्फत आवेदन दिन सक्नेछन्। एफपीओपछि लघुवित्तको चुक्ता पूँजी ८ करोड ४३ लाख ४० हजार ५५० रुपैयाँ पुग्नेछ।
