काठमाडौँ । ऊर्जा, जलस्रोत तथा सिँचाइ मन्त्रालयले सञ्चालनमा ल्याएको हटलाइन सेवा (११५१) मा उजुरी दिने नागरिकको सङ्ख्या उल्लेख्य देखिएको छ। काममा ढिलासुस्ती, सूचनाबिना नै विद्युत् सेवा बन्द हुने, मिटर नपाइने, ट्रान्सफर्मर जल्ने, अनियमित मिटर रिडिङ तथा अन्य विद्युत् सम्बन्धी समस्या समाधान गर्न हटलाइन प्रभावकारी बनेको मन्त्रालयले जनाएको छ।
ऊर्जा मन्त्री दीपक खड्काले हटलाइनमा आएका गुनासोलाई यथाशक्य चाँडो सम्बोधन गर्न निर्देशन दिएका छन्। हटलाइन सेवामा कार्यरत अधिकारीहरूका अनुसार गुनासो आउने वित्तिकै सम्बन्धित कार्यालयलाई जानकारी गराएर समस्या समाधान गरिँदै आएको छ।
हटलाइन सेवामा फागुन महिनामा मात्र १,९०२ उजुरी दर्ता भएका थिए भने चैत महिनामा एक हजारभन्दा बढी गुनासो आइसकेको छ। प्राप्त गुनासोमध्ये ट्रान्सफर्मर जल्ने, पोल ढल्ने, विद्युत् आपूर्तिमा अवरोध तथा भोल्टेज समस्यासम्बन्धी विषय प्रमुख छन्। सेवाग्राहीहरूले फोनबाहेक फेसबुक, भाइबरजस्ता डिजिटल माध्यमबाट पनि गुनासो गरिरहेका छन्।
बागमती र मधेस प्रदेशबाट सबैभन्दा बढी गुनासो प्राप्त भएको हटलाइनमा कार्यरत अधिकारीहरूले जनाएका छन्। मन्त्रालयमा सिधै गुनासो गर्न पाउने व्यवस्था भएपछि जिल्लास्थित कार्यालयमा हुने ढिलासुस्तीमा कमी आएको छ।
