काठमाडौँ । प्रधानमन्त्री केपी शर्मा ओलीले आफ्नो औपचारिक थाइल्याण्ड भ्रमणबाट नेपाल-थाइल्याण्ड सम्बन्ध थप सुदृढ भएको बताएका छन्। बैंककमा थाइल्याण्डका प्रधानमन्त्री पे थोङ् थान् शिनावात्सँगको भेटवार्तापछि संयुक्त पत्रकार सम्मेलनमा उनले संस्कृति, पर्यटन, शिक्षा, ऊर्जा लगायतका क्षेत्रमा सहकार्य अभिवृद्धि हुने विश्वास व्यक्त गरे।
नेपालमा होटल व्यवसाय, हवाई सेवा तथा पर्यटन क्षेत्रमा थाइल्याण्डको लगानी बढाउन आग्रह गर्दै उनले दुवै देशबीच व्यापार तथा अन्तर्राष्ट्रिय मुद्दाहरूमा सहकार्यलाई अझ मजबुत बनाइने बताए। साथै, उनले जलवायु परिवर्तनका मुद्दामा समेत हातेमालो गरेर अघि बढ्ने प्रतिवद्धता जनाए।
प्रधानमन्त्री ओली बिमस्टेकको छैटौँ शिखर सम्मेलनमा भाग लिन मङ्गलबार बैंकक आइपुगेका थिए। भ्रमणका क्रममा उनले थाइल्याण्डका प्रधानमन्त्रीलाई नेपाल भ्रमणको निमन्त्रणा दिएका छन्। भ्रमण दलमा प्रथम महिला राधिका शाक्य, परराष्ट्रमन्त्री डा. आरजु राणा देउवा, प्रधानमन्त्रीका मुख्य सल्लाहकार विष्णुप्रसाद रिमाल, आर्थिक-विकास सल्लाहकार डा. युवराज खतिवडा, नेपाल सरकारका मुख्यसचिव एकनारायण अर्याल, परराष्ट्र मन्त्रालयका सचिव अमृतबहादुर राईलगायत सहभागी थिए।
