काठमाडौं। नेपाल उद्योग वाणिज्य महासंघ (FNCCI) र थाईल्यान्डको थाई चेम्बर अफ कमर्श एण्ड बोर्ड अफ ट्रेडबीच व्यापार तथा आर्थिक सहकार्य विस्तारका लागि समझदारी भएको छ।
बैंककमा सम्पन्न हस्ताक्षर समारोहमा नेपालका प्रधानमन्त्री केपी शर्मा ओली र थाईल्यान्डका प्रधानमन्त्रीको उपस्थितिमा महासंघका अध्यक्ष चन्द्र प्रसाद ढकाल र बोर्ड अफ ट्रेडका अध्यक्ष सानन अंगुबोल्कुलले सम्झौतापत्रमा हस्ताक्षर गरे।
यस समझदारीले दुई देशबीच व्यापारिक सम्बन्धलाई मजबुत बनाउने, आर्थिक सहकार्यलाई प्रवद्र्धन गर्ने, र लगानी विस्तारका लागि संरचित रूपरेखा तयार गर्ने लक्ष्य लिएको छ। साथै, व्यापार मेला, व्यवसायिक फोरम, र आर्थिक कार्यक्रमहरूमा सहभागिता बढाउने, विवाद समाधान प्रणालीलाई प्रवद्र्धन गर्ने, तथा प्राविधिक विशेषज्ञता तथा तालिम आदानप्रदानलाई बलियो बनाउने विषयसमेत समेटिएको छ।
महासंघका अध्यक्ष ढकालले नेपाल–थाईल्यान्ड व्यापारिक सहकार्यले दुवै देशका व्यवसायहरूका लागि नयाँ अवसरहरू सिर्जना गर्ने विश्वास व्यक्त गरे। थाई चेम्बर अफ कमर्श एण्ड बोर्ड अफ ट्रेडका अध्यक्ष अंगुबोल्कुलले समेत सहकार्यले व्यापारिक समुदायहरूलाई प्रत्यक्ष लाभ पुग्ने बताए।
यो समझदारी बिमस्टेकको छैटौं शिखर सम्मेलनका अवसरमा तीन वर्षका लागि लागू हुनेछ। महासंघले थाईल्यान्डको बोर्ड अफ ट्रेडसँग सहकार्य गर्दै सम्झौताका लक्ष्यहरू कार्यान्वयन गर्न तत्पर रहेको जनाएको छ।
