काठमाडौं । उपप्रधानमन्त्री एवं अर्थमन्त्री विष्णुप्रसाद पौडेलले बजेट निर्माणका क्रममा लोकप्रिय हुने प्रवृत्तिबाट बाहिर निस्कनुपर्ने आवश्यक रहेको बताएका छन्।
आर्थिक वर्ष २०८२/८३ को बजेट निर्माणसम्बन्धी श्रम, रोजगार तथा सामाजिक मन्त्रालयसँगको छलफलमा उनले वितरणमुखी कार्यक्रमभन्दा यथार्थपरक र कार्यान्वयनयोग्य योजनाहरू आवश्यक भएको उल्लेख गरे।
उनले श्रम, सीप, रोजगारी र उत्पादनलाई प्राथमिकता दिनुपर्ने औंल्याउँदै केवल वितरणले उचित प्रतिफल दिन नसक्ने बताए। साथै, सामाजिक सुरक्षासँग सम्बन्धित कार्यक्रमहरूको गम्भीर समीक्षा गर्न आवश्यक रहेको र विभिन्न मन्त्रालय तथा निकायहरूमा रहेका कार्यक्रमहरूलाई एकीकृत गर्नुपर्नेमा उनले जोड दिए।
श्रम, रोजगार तथा सामाजिक मन्त्री शरतसिंह भण्डारीले रेमिट्यान्सलाई थप व्यवस्थित गर्नुपर्ने र वैदेशिक रोजगारबाट फर्किएकाहरूको सीपको सदुपयोग गर्दै आन्तरिक रोजगारीलाई प्राथमिकता दिनुपर्ने बताए।
राष्ट्रिय योजना आयोगका सदस्य डा. प्रकाशकुमार श्रेष्ठले प्रधानमन्त्री रोजगार कार्यक्रमको समीक्षा गरी अघि बढ्नुपर्ने सुझाव दिए। त्यस्तै, अर्थ सचिव घनश्याम उपाध्यायले सीप विकासलाई विशेष प्राथमिकता दिनुपर्ने आवश्यकता औंल्याए।
