काठमाडौँ । नेपालको सेयर बजारमा नयाँ प्रविधिको प्रयोग बढ्दै जाँदा मंगलबारदेखि कालिका सेक्युरिटीज (ब्रोकर नम्बर ४६) ले नयाँ ट्रेड म्यानेजमेन्ट सिस्टम (टिएमएस) मार्फत सेवा दिन सुरु गरेको छ। कम्पनीका सञ्चालक तथा स्टक ब्रोकर एसोसिएसन अफ नेपालका पूर्वअध्यक्ष नरेन्द्र सिजापतिले फेसबुकमार्फत यसबारे जानकारी दिएका छन्। उनले नयाँ प्रणालीले लगानीकर्ताको कारोबारलाई सहज, सुरक्षित र प्रभावकारी बनाउने प्रतिवद्धता जनाएका छन्।
यसअघि, गत असोजमा सेक्योर्ड सेक्युरिटीजले नेपाल स्टक एक्सचेन्ज (नेप्से) द्वारा उपलब्ध पुरानो टिएमएस सेवा बन्द गरी श्रीलङ्कन कम्पनी 'आइरन वान टेक्नोलोजी' को 'ए ट्रेड' सिस्टम प्रयोग गर्न थालेको थियो। अहिले कालिका सेक्युरिटीज लगायत अन्य ब्रोकर कम्पनीहरू पनि यही प्रविधिमा आधारित नयाँ टिएमएस सञ्चालन गर्दैछन्। प्रज्ञान सेक्युरिटीजले गत बुधवारदेखि सेवा सुरु गरिसकेको छ भने नेपाल स्टक हाउस, एनआइएमबि स्टक मार्केट, डायनामिक मनि म्यानेजर, र त्रिशक्ति सेक्युरिटीजले समेत छिट्टै नयाँ प्रणाली लागू गर्ने नेप्सेले जनाएको छ।
नयाँ टिएमएसले लगानीकर्ताहरूलाई मोबाइल एपमार्फत सहजै सेयर कारोबार गर्न, शुल्क नतिरी सेवा लिन, र कारोबारपछि स्वचालित रूपमा कोल्याट्रल लोड हुने सुविधा प्रदान गर्छ। यसअघि ब्रोकरलाई टेलिफोन गरी कोल्याट्रल लोड गराउनु पर्ने झन्झट थियो, जुन अब हटेको छ। साथै, नयाँ प्रणाली छिटो, छरितो र प्रविधिमैत्री भएकाले लगानीकर्ताले थप सहज अनुभव गर्न सक्ने कालिका सेक्युरिटीजका सञ्चालक सिजापतिले बताएका छन्।
