काठमाडौँ । नेपाल क्लियरिङ हाउस लिमिटेड (एनसीएचएल) ले ‘एनपीएस–नेसनल कार्ड स्विच’ (एनपीएस–एनसीएस) तथा ‘डोमेस्टिक कार्ड स्किम’ अन्तर्गत ‘नेपाल पे कार्ड’ सार्वजनिक गरेको छ। सोमबार आयोजित कार्यक्रममा नेपाल राष्ट्र बैंकका गभर्नर महाप्रसाद अधिकारीले कार्डको औपचारिक उद्घाटन गर्दै यसले आर्थिक स्वायत्ततामा महत्त्वपूर्ण योगदान गर्ने बताए।
प्रारम्भिक चरणमा सिटिजन्स बैंक, हिमालयन बैंक, माछापुच्छ्रे बैंक, एनएमबी बैंक, प्रभु बैंक, मुक्तिनाथ विकास बैंक, सांग्रिला डेभलपमेन्ट बैंक, सिद्धार्थ बैंक, र गुडविल फाइनान्समार्फत नेपाल पे कार्ड जारी गरिनेछ। यो प्रणाली अन्तर्गत डेबिट, क्रेडिट, प्रिपेड, र भर्चुअल कार्ड क्रमिक रूपमा उपलब्ध हुनेछन् भने सबै कारोबारको डेटा स्वदेशमै सुरक्षित रहनेछ।
नेपाल राष्ट्र बैंकको रणनीतिअनुसार कार्यान्वयनमा आएको यस परियोजनाले भिसा र मास्टरकार्ड जस्ता अन्तर्राष्ट्रिय प्रदायकमार्फत भुक्तानी गर्दा लाग्ने अतिरिक्त लागत कटौती गर्ने विश्वास गरिएको छ। कार्यक्रममा हिमालयन बैंकले गभर्नरलाई पहिलो नेपाल पे कार्ड जारी गरेको थियो भने माछापुच्छ्रे बैंकमा पहिलो पीओएस कारोबार सम्पन्न भएको थियो। भविष्यमा यस कार्डलाई अन्तर्राष्ट्रिय रूपमा प्रयोग गर्न मिल्ने गरी काम भइरहेको एनसीएचएलले जनाएको छ।
