काठमाडौं । साताको दोस्रो कारोबार दिन मंगलबार नेप्से परिसूचक घटेर बन्द भएको छ। अघिल्ला तीन कारोबार दिनदेखि लगातार बढिरहेको नेप्से यस दिन करेक्सन भई १६.९५ अंकले घटेर २,६७६.१७ विन्दुमा झरेको हो। अल्पकालीन लगानीकर्ताहरूले नाफा बुक गरेसँगै नेप्सेमा गिरावट आएको हो।
यस दिन सेन्सेटिभ इन्डेक्स ३.५७ अंकले, फ्लोट इन्डेक्स १.४७ अंकले, र सेन्सेटिभ फ्लोट इन्डेक्स १.०६ अंकले घटेका छन्। साथै, कारोबार रकम पनि घट्दै ५ अर्ब ७९ करोड ७७ लाख ९१ हजार रुपैयाँमा सीमित भएको छ, जुन अघिल्लो कारोबार दिन आइतबारको साढे ७ अर्बको तुलनामा कम हो।
सबैभन्दा बढी मूल्य वृद्धि गार्डियन माइक्रो लाइफ इन्स्योरेन्सको भएको छ। कम्पनीले शतप्रतिशत हकप्रद शेयर निष्काशन गर्ने घोषणा गरेसँगै यसको शेयरमूल्य २३४ रुपैयाँ ५० पैसा बढेर २,५७९ रुपैयाँ ८० पैसामा पुगेको छ। त्यस्तै, राधी विद्युत कम्पनी, सयपत्री हाइड्रोपावर, र विशाल बजार कम्पनीका शेयर ४ प्रतिशतभन्दा बढीले बढेका छन्।
गुराँस लघुवित्त वित्तीय संस्थाको शेयरमूल्य सर्वाधिक ५.५६ प्रतिशतले घटेको छ। कारोबार रकमका आधारमा हिमालयन रि इन्स्योरेन्स शीर्ष स्थानमा रहेको छ, जसको ६४ करोड २५ लाख रुपैयाँ बराबरको कारोबार भएको छ। एनआरएन इन्फ्रास्ट्रक्चर एण्ड डेभलपमेन्टको साढे ४५ करोड, र सिईडिबी होल्डिङ्सको करिब २८ करोडको शेयर कारोबार भएको छ।
१३ उपसमूहमध्ये १२ उपसमूहको परिसूचक घटेको छ भने व्यापार उपसमूह मात्र ३.८० प्रतिशतले वृद्धि भएको छ। वित्त उपसमूहको परिसूचक सर्वाधिक १.८४ प्रतिशतले घटेको छ भने होटल तथा पर्यटन, लघुवित्त, र अन्य उपसमूहका परिसूचक पनि १ प्रतिशतभन्दा बढीले घटेका छन्।
