काठमाडौं। त्रिभुवन अन्तर्राष्ट्रिय विमानस्थल (टीआईए) आजदेखि दैनिक १८ घण्टा सञ्चालनमा आउने भएको छ। नेपाल नागरिक उड्डयन प्राधिकरण (क्यान)ले विमानस्थलको सञ्चालन समय वृद्धि गर्दै आजदेखि नयाँ समयतालिका लागू गरेको हो।
गत कात्तिक २३ गतेदेखि स्तरोन्नतिका लागि विमानस्थलको सञ्चालन अवधि घटाएर दैनिक १४ घण्टामा सीमित गरिएको थियो। तर, स्तरोन्नतिको कार्य आंशिक रूपमा सम्पन्न भएसँगै अब विमानस्थल बिहान ६ बजेदेखि राति १२ बजेसम्म सञ्चालन हुनेछ।
त्रिभुवन अन्तर्राष्ट्रिय विमानस्थल कार्यालयका प्रमुख जगन्नाथ निरौलाका अनुसार यसअघि विमानस्थल बिहान ८ बजेदेखि बेलुकी १० बजेसम्म मात्र खुल्ने गरेको थियो। समर सिजनका लागि नयाँ फ्लाइट सेड्युलसमेत निर्धारण गरिएको प्राधिकरणले जनाएको छ।
तर, स्तरोन्नति सुरु हुनुअघि विमानस्थल राति साढे २ बजेसम्म सञ्चालन हुँदै आएको थियो। अब १८ घण्टा सञ्चालन भएपछि यात्रु तथा हवाई सेवा प्रदायक कम्पनीहरूलाई थप सुविधा पुग्ने अपेक्षा गरिएको छ।
