काठमाडौं । ज्योति विकास बैंकले सुदूरपश्चिम प्रदेशका विभिन्न जिल्लाका अस्पताल तथा बर्थिङ सेन्टरहरूलाई ‘बेबी वार्मर’ प्रदान गरेको छ।बैंकले ग्रामीण क्षेत्रमा जीवनरक्षक चिकित्सा उपकरणको आवश्यकता ध्यानमा राख्दै सुदूरपश्चिमका दुर्गम चार स्थानमा बेबी वार्मर जडान गरेको जनाएको छ। नवजात शिशुको शारीरिक तापक्रम सन्तुलनमा राख्न तथा हाइपोथर्मियाको जोखिम न्यूनीकरण गर्न यो उपकरण महत्वपूर्ण मानिन्छ।
सुरक्षित प्रसूति सेवाको पहुँच विस्तार गर्ने उद्देश्यले बैंकले आफ्ना शाखा नभएका स्थानमा समेत उपकरण हस्तान्तरण गरेको हो। यस क्रममा बैतडीको श्रीकोट हेल्थ पोस्ट, दार्चुलाको सर्मौली हेल्थ पोस्ट र सौगन्ना आधारभूत स्वास्थ्य केन्द्र, तथा बाजुराको ब्रह्मटोल हेल्थ पोस्ट मा बेबी वार्मर जडान गरिएको छ।ज्योति विकास बैंकका मार्केटिङ, ब्रान्डिङ तथा डिपोजिट सेल्स विभाग प्रमुख कुशलजंग अधिकारीले स्थानीय स्वास्थ्य संस्थाका पदाधिकारी तथा सम्बन्धित क्षेत्रका प्रतिनिधिहरूको उपस्थितिमा बेबी वार्मर हस्तान्तरण गरेका थिए।
त्यस अवसरमा अस्पतालका डाक्टर, नर्स तथा सम्बन्धित कर्मचारीलाई विशेषज्ञमार्फत बेबी वार्मर सञ्चालनसम्बन्धी विशेष तालिमसमेत प्रदान गरिएको थियो। बैंकको यस पहलकदमीले दुर्गम भेगका नवजात शिशुहरूलाई सुरक्षित स्वास्थ्य सेवा प्राप्त गर्न मद्दत गर्ने विश्वास गरिएको छ।
