काठमाडौं । गत माघ १८ गतेदेखि जारी प्रतिनिधिसभाको हिउँदो अधिवेशन आज समापन हुँदै छ। संसद् सचिवालयका अनुसार अन्तिम बैठक बिहान ११ बजे बस्ने तय गरिएको छ।
बैठकमा प्रधानमन्त्री केपी शर्मा ओलीको तर्फबाट राष्ट्रिय समावेशी आयोग र मुस्लिम आयोगको छैटौं वार्षिक प्रतिवेदन पेस हुनेछ। साथै, विभिन्न विधेयकहरूमाथि छलफल र पारित गर्ने प्रस्तावहरू पेश हुनेछन्।
संस्कृति, पर्यटन तथा नागरिक उड्डयन मन्त्री बद्रीप्रसाद पाण्डेले नेपाल हवाई सेवा प्राधिकरण विधेयक, अर्थमन्त्री विष्णुप्रसाद पौडेलले बैंकिङ कसुर तथा सजाय (दोस्रो संशोधन) विधेयक, शिक्षा मन्त्री विद्या भट्टराईले सहिद दशरथ चन्द स्वास्थ्य विज्ञान विश्वविद्यालय विधेयक, र ऊर्जा मन्त्री दीपक खड्काले जलस्रोत विधेयकमाथि छलफल र पारित गर्ने प्रस्तावहरू प्रस्तुत गर्ने कार्यसूची छ।
सरकारले सोमबार अधिवेशन अन्त्यको सिफारिस गरिसकेको छ, जसअनुसार आज राति १२ बजेदेखि चालू अधिवेशन समाप्त हुनेछ।
