काठमाडौँ । बैंकिङ प्रणालीमा अधिक तरलता थुप्रिएपछि नेपाल राष्ट्र बैंकले लगातार निक्षेप संकलन उपकरण प्रयोग गर्दै पैसा खिचिरहेको छ। राष्ट्र बैंकले आज फेरि बैंकिङ प्रणालीबाट एकै पटक २० अर्ब रुपैयाँ तान्ने भएको छ। यसका लागि आज दिउँसो ३ बजे बोलकबोल हुने राष्ट्र बैंकले जनाएको छ। इच्छुक बैंक तथा वित्तीय संस्थाले न्यूनतम १० करोड रुपैयाँ र अधिकतम ५ अर्ब रुपैयाँसम्मको भाग राखी कुल आह्वान रकमसम्मका लागि आवेदन दिन सक्नेछन्।
राष्ट्र बैंकले २१ दिनका लागि उक्त रकम झिक्न लागेको हो, जसको साँवा तथा ब्याज भुक्तानी चैत ३१ गते हुनेछ। नेपाल राष्ट्र बैंकबाट इजाजत प्राप्त क, ख, र ग वर्गका बैंक तथा वित्तीय संस्थाले निक्षेप संकलन प्रक्रियामा सहभागिता जनाउन सक्ने छन्।
