काठमाडौं । चालु आर्थिक वर्षमा पेट्रोलियम पदार्थको खपत वृद्धि भएको छ । भन्सार विभागको तथ्यांकअनुसार चालु आवको पहिलो आठ महिनामा डिजेल, पेट्रोल, मट्टीतेल, हवाई इन्धन र खाना पकाउने एलपी ग्यासको खपत बढेको देखिएको छ। गत वर्षको फागुनको तुलनामा यो वर्ष पेट्रोलियम पदार्थको खपत औसतमा ८.४२ प्रतिशतले बढेको छ।
मट्टीतेलको खपत सबैभन्दा धेरै १६.४८ प्रतिशतले वृद्धि भएको छ भने पेट्रोलको खपत ८.८४ प्रतिशतले बढेर ४ लाख ८९ हजार ८४२ किलोलिटर पुगेको छ । खाना पकाउने एलपी ग्यासको आयात ४.२८ प्रतिशतले वृद्धि भई ३६ करोड २० लाख ९५ हजार किलो पुगेको छ। डिजेलको खपत ३.३५ प्रतिशतले बढ्दा हवाई इन्धनको खपत ९.१६ प्रतिशतले बढेको छ।
नेपाल आयल निगमका अनुसार आर्थिक गतिविधि क्रमशः चलायमान हुन थालेकाले इन्धनको खपत बढेको हो । निर्माण उद्योगमा वृद्धि, बिजुली आपूर्तिमा समस्या, पर्यटन व्यवसायको चहलपहल तथा होटल–रेष्टुरेन्टको पूर्ण क्षमतामा सञ्चालनले इन्धनको माग बढाएको छ । यद्यपि, पेट्रोलियम पदार्थको आयात बढे पनि अन्तर्राष्ट्रिय बजारमा कच्चा तेलको मूल्य घटेकाले विदेशिने रकम ४.२३ प्रतिशतले घटेको छ । चालु वर्षको पहिलो आठ महिनामा इन्धन खरिदका लागि १ खर्ब ७६ अर्ब १३ करोड रुपैयाँ विदेशिएको छ, जुन गत वर्षको तुलनामा ७ अर्ब ७८ करोड रुपैयाँ कम हो।
आयात वृद्धिसँगै सरकारले राजस्व संकलनमा पनि वृद्धि गरेको छ । गत वर्षको तुलनामा चालु वर्षमा ३ अर्ब ६१ करोड रुपैयाँ बढी राजस्व संकलन भई कुल ७२ अर्ब ४३ करोड रुपैयाँ पुगेको छ। डिजेल आयातबाट ३४ अर्ब ७८ करोड, पेट्रोलबाट २७ अर्ब ८१ करोड, हवाई इन्धनबाट १ अर्ब ९८ करोड, तथा एलपी ग्यासबाट ७ अर्ब ६४ करोड राजस्व संकलन भएको छ।
