काठमाडौं । चालु आर्थिक वर्ष २०८१/८२ को पहिलो आठ महिनामा मुलुकको वैदेशिक व्यापारमा सुधार देखिएको छ। भन्सार विभागका अनुसार साउनदेखि फागुन मसान्तसम्म १३ खर्ब ३ अर्ब ७३ करोड ८६ लाख रुपैयाँ बराबरको कुल वैदेशिक व्यापार भएको छ। सो अवधिमा आयात ११.२० प्रतिशत र निर्यात ५७.२० प्रतिशतले वृद्धि भएको छ। फागुन मसान्तसम्म ११ खर्ब ४५ अर्ब ५६ करोड ६२ लाख रुपैयाँ बराबरको वस्तु तथा सेवा आयात हुँदा १ खर्ब ५८ अर्ब १७ करोड २४ लाख रुपैयाँ बराबरको वस्तु तथा सेवा निर्यात भएको छ। अघिल्लो वर्षको तुलनामा आयात, निर्यात र समग्र वैदेशिक व्यापारमा वृद्धि भएको देखिएको छ।
यद्यपि, मुलुकको व्यापार घाटा ६.२२ प्रतिशतले बढेको छ। गत वर्ष ९ खर्ब २९ अर्ब ६० करोड ५२ लाख रुपैयाँ व्यापार घाटा रहेकाेमा चालु आर्थिक वर्षको सोही अवधिमा ९ खर्ब ८७ अर्ब ३९ करोड ३८ लाख रुपैयाँ बराबरको व्यापार घाटा व्यहोर्नुपरेको छ। यस अवधिमा कुल वैदेशिक व्यापारमा ८.९० प्रतिशत हिस्सा आयातको रहेको छ भने १२.१३ प्रतिशत हिस्सा निर्यातको रहेको छ। अघिल्लो आर्थिक वर्ष २०८०/८१ मा नेपालले १० खर्ब ३० अर्ब २२ करोड रुपैयाँ बराबरको आयात र १ खर्ब ६१ करोड ७४ लाख रुपैयाँ बराबरको निर्यात गरेको थियो।
