काठमाडौँ । माछापुच्छ्रे क्यापिटलले फागुन २२ गतेदेखि निष्काशन तथा बिक्री खुला गरेको सामूहिक लगानी कोष एमबीएल इक्विटी फण्डको इकाई खरिदका लागि आवेदन दिने आज (चैत ७ गते) बिहीबार अन्तिम दिन रहेको छ। प्रतिइकाई १० रुपैयाँ अंकित दरमा एक अर्ब २० करोड रुपैयाँ बराबरका १२ करोड इकाई बिक्रीमा ल्याएको उक्त फण्ड १२ वर्षे बन्दमुखी प्रकृतिको योजना हो।
फण्डले १५ प्रतिशत इकाईमध्ये १४ प्रतिशत (१ करोड ६८ लाख इकाई) कोष प्रवर्धक माछापुच्छ्रे बैंकलाई र १ प्रतिशत (१२ लाख इकाई) योजना व्यवस्थापकलाई सुरक्षित गरी बाँकी १० करोड २० लाख इकाई सर्वसाधारणलाई बिक्री गरेको छ। न्यूनतम १०० देखि अधिकतम १ करोड २० लाख इकाईसम्म आवेदन दिन सकिने व्यवस्था गरिएको छ।
फण्डको धितोपत्र निष्काशन तथा बिक्री प्रबन्धक आरबिबि मर्चेन्ट बैंकिङ्ग लिमिटेड रहेको छ भने लगानीकर्ताले धितोपत्र बोर्डबाट स्वीकृति प्राप्त सम्पूर्ण आस्बा सदस्य बैंक तथा वित्तीय संस्थाका तोकिएका शाखा वा ‘मेरो शेयर’ अनलाइनमार्फत सि–आस्बा प्रणाली प्रयोग गरी आवेदन दिन सक्नेछन्। यस फण्डका लागि केयर रेटिङ्ग नेपालले कोष प्रवर्धकलाई ‘केयर एनपी ट्रिपल बी प्लस’ इस्यूअर रेटिङ्ग प्रदान गरेको छ भने योजना व्यवस्थापकलाई इन्फोमेरिक्स क्रेडिट रेटिङ्ग नेपाल लिमिटेडले ‘आईआरएन एएमसी क्वालिटि ३’ रेटिङ्ग प्रदान गरेको छ।
