काठमाडौं । नेपाल राष्ट्र बैंकले गैरबैंकिङ क्षेत्रका विभिन्न संस्थाहरूलाई नियमन गर्दै ६५ वटा गैरकानुनी गतिविधिमा संलग्न संस्थाहरूमाथि कारबाही प्रक्रिया अघि बढाएको छ। राष्ट्र बैंकको गैर-बैंकिङ सुपरिवेक्षण विभागले ‘नन-बैंकिङ फाइनान्सियल इन्स्टिट्युसन सुपरिवेक्षण रिपोर्ट २०२३/२४’ सार्वजनिक गर्दै १५८ संस्थाको सुपरिवेक्षण गरेको थियो, जसमा ६५ संस्थाहरूले तोकिएको निर्देशन विपरीत कार्य गरेको पाइएको छ। कारबाहीस्वरूप १० संस्थालाई आर्थिक जरिवाना, ५ संस्थाको अनुमतिपत्र अस्थायी रूपमा निलम्बन तथा २ संस्थाको अनुमतिपत्र खारेज गरिएको छ।
गैर-बैंकिङ सुपरिवेक्षण विभागले मनी चेन्जर, हायर पर्चेज, जलविद्युत लगानी, रेमिट्यान्स कम्पनी, होटल, ट्राभल तथा ट्रेकिङ कम्पनी, एयरलाइन्स, कार्गो र सहकारी बैंकहरूमा स्थलगत र गैर स्थलगत निरीक्षण गर्दै वित्तीय कारोबार, जोखिम व्यवस्थापन प्रणाली तथा नियामक निर्देशिकाको पालना नगरेका कारण सुधारात्मक निर्देशन दिएको छ। नियामक नियम उल्लंघन गर्नेहरूमाथि जरिवाना तथा लाइसेन्स खारेजसम्मको कारबाही गरिएको राष्ट्र बैंकले जनाएको छ। वित्तीय प्रणालीमा पारदर्शिता, स्थायित्व तथा विश्वसनीयता कायम गर्न राष्ट्र बैंकले कडाइका साथ सुपरिवेक्षण प्रक्रिया अगाडि बढाउने स्पष्ट पारेको छ।
