काठमाडाैं । चालु आर्थिक वर्षका पहिलो ८ महिनामा सरकारको ऋणभार उल्लेख्य रूपमा बढेको छ। सार्वजनिक ऋण व्यवस्थापन कार्यालयका अनुसार, फागुन मसान्तसम्म सरकारको तिर्न बाँकी सार्वजनिक ऋणको कुल परिमाण २६ खर्ब ७६ अर्ब ३ करोड रुपैयाँ पुगेको छ, जुन नेपालको कुल गार्हस्थ्य उत्पादन (जीडीपी)को ४६.९१ प्रतिशत हो।
गत असार मसान्तसम्म सार्वजनिक ऋण २४ खर्ब ३४ अर्ब ९ करोड रुपैयाँ थियो। त्यसमा चालु आर्थिक वर्षको ८ महिनामै झन्डै साढे २ खर्ब थपिएको हो। कुल सार्वजनिक ऋणमध्ये १३ खर्ब १५ अर्ब ५७ करोड आन्तरिक स्रोतबाट लिइएको छ भने १३ खर्ब ६० अर्ब ४६ करोड रुपैयाँ बाह्य स्रोतबाट प्राप्त भएको छ। जीडीपीको अनुपातमा हेर्दा आन्तरिक ऋण २३.०६ प्रतिशत र बाह्य ऋण २३.८५ प्रतिशत रहेको छ।
यस वर्ष सरकारले कुल ५ खर्ब ४७ अर्ब रुपैयाँ ऋण परिचालन गर्ने लक्ष्य राखेको थियो। तर, फागुन मसान्तसम्म ३ खर्ब ३४ अर्ब ६२ करोड रुपैयाँ मात्र ऋण प्राप्त भएको छ। सरकारको बढ्दो ऋणभारले अर्थतन्त्रमा थप दबाब सिर्जना गर्ने आँकलन गरिएको छ। ऋणको दिगो व्यवस्थापनबारे बहस जरुरी भएको विज्ञहरूको धारणा छ।
