काठमाडौँ । नेपाल राष्ट्र बैंकले बैंक तथा वित्तीय संस्थाहरूको सामाजिक उत्तरदायित्व (सीएसआर) खर्चलाई पारदर्शी र प्रभावकारी बनाउन नयाँ मार्गदर्शन जारी गरेको छ। ‘बैंक तथा वित्तीय संस्थाको संस्थागत सामाजिक उत्तरदायित्वसम्बन्धी मार्गदर्शन, २०८१’ अनुसार, बैंकहरूले प्रत्येक आर्थिक वर्षको खुद नाफाको एक प्रतिशत सामाजिक उत्तरदायित्व कोषमा राख्नुपर्नेछ।
कोषमा संकलित रकम लामो समयसम्म खर्च नहुने प्रवृत्तिलाई रोक्न, राष्ट्र बैंकले अब सो कोषको ६० प्रतिशत रकम अनिवार्य रूपमा एक वर्षभित्र खर्च गर्नुपर्ने व्यवस्था लागू गरेको छ। यस कोषलाई शिक्षा, स्वास्थ्य, वातावरण संरक्षण, वित्तीय साक्षरता, दिगो विकास लक्ष्य, विपद् व्यवस्थापन तथा परोपकारी कार्यहरूमा मात्र उपयोग गर्नुपर्ने प्रावधान गरिएको छ।
विद्यालय र सामुदायिक कलेजको पूर्वाधार सुधार, छात्रवृत्ति, अस्पतालका लागि आवश्यक उपकरण तथा स्वास्थ्य सामग्री, रक्तदान कार्यक्रम र निःशुल्क स्वास्थ्य शिविर सञ्चालन जस्ता गतिविधिमा खर्च गर्नुपर्नेछ। साथै, वाणिज्य बैंक र राष्ट्रिय स्तरका वित्तीय संस्थाहरूले सीएसआर कोषबाट प्रत्येक प्रदेशमा न्यूनतम १० प्रतिशत रकम अनिवार्य रूपमा विनियोजन गर्नुपर्ने नियम लागू गरिएको छ, जसले वित्तीय स्रोतको समान वितरण सुनिश्चित गर्नेछ।
