काठमाडौँ । स्थानीय तथा वैदेशिक रोजगारीमा रहेका नेपालीहरूका लागि पियोर इनर्जी लिमिटेडको आईपीओमा आवेदन दिने आज (चैत्र ५) अन्तिम दिन रहेको छ। कम्पनीले फागुन २० गतेदेखि बाँके जिल्लाका आयोजना प्रभावित स्थानीय बासिन्दा र श्रम स्वीकृति लिएर वैदेशिक रोजगारीमा गएका नेपालीहरूलाई आईपीओ बिक्री खुला गरेको थियो।
यस अन्तर्गत स्थानीय बासिन्दाहरूका लागि १ लाख ६० हजार कित्ता शेयर निष्काशन गरिएको छ, जसमा न्यूनतम १० कित्ता र अधिकतम १६ हजार कित्ताका लागि आवेदन दिन सकिन्छ, भने वैदेशिक रोजगारीमा रहेका नेपालीहरूका लागि १ लाख ४४ हजार कित्ता शेयर निष्काशन गरिएको छ, जसमा न्यूनतम १० कित्ता र अधिकतम ७२ सय कित्ताका लागि आवेदन दिन सकिनेछ।
नेपाल धितोपत्र बोर्डले फागुन २ गते पियोर इनर्जीलाई आईपीओ निष्काशनको अनुमति दिएको थियो, जसअन्तर्गत कम्पनीले कुल १६ करोड रुपैयाँ बराबरको १६ लाख कित्ता शेयर निष्काशन गर्नेछ। आयोजना प्रभावित स्थानीय र वैदेशिक रोजगारीमा गएकाहरूलाई बाँडफाँट गरिसकेपछि कम्पनीले सर्वसाधारणका लागि पनि शेयर निष्काशन गर्नेछ।
कुल ८० करोड रुपैयाँ चुक्ता पूँजी रहेको कम्पनीमा संस्थापकहरूको ८० प्रतिशत स्वामित्व रहेको छ भने बाँकी २० प्रतिशत शेयर सर्वसाधारणका लागि निष्काशन हुँदैछ। शेयर निष्काशन तथा बिक्री प्रबन्धक नबिल इन्भेष्टमेन्ट बैंकिङ्ग लिमिटेड रहेको छ। गोल्यान ग्रुपअन्तर्गत रहेको पियोर इनर्जी सोलार कम्पनीले बाँकेमा १०-१० मेगावाटका दुईवटा सौर्य आयोजना सञ्चालन गरिरहेको छ, जसले २०८० सालदेखि नै व्यावसायिक उत्पादन सुरु गरिसकेको छ। हाल २० मेगावाट क्षमतासहित पियोर इनर्जी नेपालकै सबैभन्दा ठूलो सौर्य ऊर्जा उत्पादन गर्ने कम्पनी हो।
