काठमाडौँ । क्रेस्ट माइक्रो लाइफ इन्स्योरेन्स लिमिटेडले निष्काशन गरेको आईपीओ आज चैत्र ५ गते मंगलबार बिहान ८:३० बजे बिक्री प्रबन्धक एनआइएमबि एस क्यापिटलमार्फत बाँडफाँड हुँदै छ। कम्पनीले फागुन २२ देखि फागुन २६ गतेसम्म सर्वसाधारणका लागि १८ करोड ४५ लाख रुपैयाँ बराबरको १८ लाख ४५ हजार कित्ता शेयर निष्काशन गरेको थियो, जहाँ न्यूनतम १० कित्ता र अधिकतम १ लाख कित्ताको लागि आवेदन दिन सकिन्थ्यो।
यसअघि कम्पनीले वैदेशिक रोजगारीमा रहेका नेपाली नागरिकलाई शेयर निष्काशन गरी बाँडफाँड गरिसकेको छ। नेपाल धितोपत्र बोर्डले माघ ३ गते कम्पनीलाई २२ करोड ५० लाख रुपैयाँ बराबरको २२ लाख ५० हजार कित्ता शेयर निष्काशनको अनुमति प्रदान गरेको थियो। कम्पनीले प्रति कित्ता १०० रुपैयाँमा शेयर निष्काशन गरेको हो। नेपाल सरकारको कम्पनी रजिष्ट्रारको कार्यालयमा दर्ता भई नेपाल बीमा प्राधिकरणबाट इजाजतपत्र प्राप्त क्रेस्ट माइक्रो लाइफ इन्स्योरेन्स, लघु जीवन बीमा व्यवसाय सञ्चालन गर्ने संस्था हो।
