काठमाडौँ । नेपाल राष्ट्र बैंकका गभर्नर महाप्रसाद अधिकारीले बैंक तथा वित्तीय संस्थाबाट मात्रै कारोबार गर्न आग्रह गर्दै वित्तीय साक्षरताको महत्वलाई उजागर गरेका छन्। सोमबार काठमाडौंमा आयोजित ‘ग्लोबल मनी वीक’ कार्यक्रममा बोल्दै उनले अनुमतिप्राप्त बैंक तथा वित्तीय संस्थामार्फत बचत गर्ने बानीको विकास गर्नुपर्ने बताए। उनले वित्तीय समावेशीतालाई राष्ट्र बैंकको प्राथमिक एजेन्डाको रूपमा उल्लेख गर्दै सर्वसाधारणका बैंक खाता सक्रिय रूपमा सञ्चालन गर्नुपर्नेसमेत बताए।
वित्तीय सचेतनाले व्यक्तिगत सुरक्षासँगै स्वच्छ समाज निर्माणमा टेवा पुग्ने बताउँदै, राष्ट्र बैंकले विद्यार्थी उमेरमै वित्तीय साक्षरताका लागि प्रयास गरिरहेको जानकारी दिए। यसैक्रममा स्कुल पाठ्यक्रममा वित्तीय शिक्षा समावेश गर्न पाठ्यक्रम विकास केन्द्रसँग अन्तरक्रिया भइरहेको उनले बताए। बचत र बजेटिङ आवश्यक रहेको उल्लेख गर्दै, आफ्नो क्षमता अनुसार मात्र खर्च गर्ने परिपाटी विकास गर्नुपर्नेमा उनले जोड दिए। वित्तीय साक्षरताका लागि राष्ट्र बैंकले देशभर जागरण अभियान सञ्चालन गरिरहेको र यसलाई अझ व्यापक बनाउने योजना रहेको उनले स्पष्ट पारे।
