काठमाडौँ । नेपाल राष्ट्र बैंकले आज, चैत ४ गतेदेखि चैत १० गतेसम्म ‘थिङ्क बिफर यु फलो, वाइज मनि टुमरो’ भन्ने नाराका साथ ग्लोबल मनी विक २०२५ मनाउने तयारी गरेको छ। आर्थिक सहयोग र विकास संगठन (ओइसिडि) को संयोजनमा सन् २०१२ देखि हरेक वर्ष विश्वभर मनाइँदै आएको यो अभियानले बालबालिका र युवाहरूमा वित्तीय ज्ञान, सीप, मनोवृत्ति र व्यवहारको विकास गर्ने लक्ष्य राखेको छ। हालसम्म १७६ देशका ६ करोडभन्दा बढी युवामाझ पुगिसकेको यो अभियान नेपालमा राष्ट्र बैंकको राष्ट्रिय संयोजनमा मनाइँदैछ। वित्तीय प्रणालीमा आबद्ध संस्थाहरूको सक्रिय सहभागितासहित गैरसरकारी संघसंस्था तथा अन्य सरोकारवालाहरू पनि यस अभियानमा सहभागी हुनसक्ने बताइएको छ। राष्ट्र बैंकले वित्तीय साक्षरताका लागि क्रियाशील सम्पूर्ण संघसंस्था तथा निकायहरूलाई यस अभियानमा सहभागी भई कार्यक्रमहरूको जानकारी उपलब्ध गराउन आह्वान गरेको छ।
