काठमाडौं । उपप्रधानमन्त्री एवं अर्थमन्त्री विष्णुप्रसाद पौडेलले अर्थ मन्त्रालय, सम्बन्धित मन्त्रालय र राष्ट्रिय योजना आयोगसँग समन्वय गरी आगामी वर्षको बजेट निर्माण हुने बताएका छन्। आर्थिक वर्ष २०८२/८३ को बजेट निर्माण सम्बन्धी गृह मन्त्रालयसँगको छलफलमा उनले तीन पक्षबीचको समन्वयले बजेटप्रति अपनत्व बढाउने र कार्यान्वयनमा सहजता ल्याउने बताए।
छलफल र परामर्शमार्फत बजेट निर्माण गर्दा बुझाइमा एकरुपता आउने र देखा परेका चुनौती तथा समस्याहरू समाधान गर्दै अघि बढ्न सकिने उनको भनाइ छ। साथै, उनले नीति तथा कार्यक्रम र बजेटबीच समन्वय आवश्यक रहेकोमा जोड दिए। अर्थमन्त्री पौडेलले उपलब्ध साधन स्रोतको उचित व्यवस्थापन गर्दै बजेट तथा कार्यक्रमको प्रस्ताव पेश गर्न आग्रह गरे। गृह मन्त्रालयसँगको छलफलमा गृहमन्त्री रमेश लेखक, राष्ट्रिय योजना आयोगका उपाध्यक्ष, अर्थ सचिव, गृह सचिव, नेपाल प्रहरी र सशस्त्र प्रहरीका प्रमुखलगायत उपस्थित थिए।
