काठमाडौं । अन्तर्राष्ट्रिय भुक्तानी सेवा प्रदायक भिसा र नेपालको अग्रणी डिजिटल भुक्तानी नेटवर्क फोनपेको सहकार्यमा ‘स्क्यान टु पे’ सेवा सुरु गरिएको छ। यस सुविधाले नेपाल भ्रमण गर्ने पर्यटकहरूलाई फोनपे क्यूआर प्रणालीमार्फत भिसा कार्डबाट भुक्तानी गर्न सहज बनाउनेछ। नेपालका १५ लाखभन्दा बढी क्यूआर व्यवसायहरूमा यो सेवा उपलब्ध हुनेछ, जसले डिजिटल भुक्तानीलाई अझ सुरक्षित, सहज र सुविधाजनक बनाउने अपेक्षा गरिएको छ।
भिसा नेपाल, बंगलादेश, र भुटानका कन्ट्री म्यानेजर सब्बीर अहमदले नेपालमा डिजिटल भुक्तानीको विस्तारका लागि फोनपेसँगको सहकार्य महत्वपूर्ण भएको बताएका छन्। फोनपेका सीईओ दिवस सापकोटाले यो साझेदारीले नेपालमा सीमापार भुक्तानीलाई प्रवर्द्धन गर्ने उल्लेख गरे। क्यूआर कोड प्रविधिको व्यापक प्रयोगले नेपालका साना तथा ठूला व्यवसायहरूलाई डिजिटल भुक्तानी प्रणालीमा आबद्ध गर्दै नगदरहित कारोबारलाई प्रोत्साहन गर्ने विश्वास गरिएको छ।
