नेप्सेमा नयाँ नेतृत्वका लागि १० जनाको आवेदन, को बन्ला सीईओ?

काठमाडौँ । नेपाल स्टक एक्सचेञ्जको प्रमुख कार्यकारी अधिकृतपदका लागि १० जनाको आवेदन परेको छ । अर्थ मन्त्रालयले उक्त पदमा आवेदन दिने म्याद (थपिएको समेत) आइतबारसम्मका लागि तोकेको थियो । यसबीचमा पूर्णप्रसाद आचार्य, बद्रिप्रसाद प्याकुरेल, नारदकुमार लुइटेल, युवराज दाहाल, प्रविण अधिकारी, चुडामणी चापागाईँ, बिमलकुमार तिवारी, कृष्णबहादुर कार्की, हेमन्त वश्याल र मुकुन्दराज जोशीको आवेदन परेको अर्थ मन्त्रालयले जनाएको छ ।

आइतबार साँझ ५ बजेसम्म प्राप्त आवेदनबाट यो सूची जारी गरिएको अर्थ मन्त्रालयले जनाएको छ । अर्थ मन्त्रालयका सहसचिवहरुको समूहले उनीहरुमध्येबाट नयाँ सीईओ नियुक्ति गर्ने प्रक्रिया अघि बढाउने छन् । नेप्सेमा भर्खरै कार्यकाल सक्काएर बाहिरिएका कृष्णबहादुर कार्कीले पनि आवेदन दिएका थिए । उनले यसअघि नेपाल धितोपत्र बोर्डको अध्यक्षका लागि पनि आवेदन दिएका थिए ।