काठमाडौँ । नेपाल सुपर लिग (एनएसएल) को तेस्रो संस्करणका लागि एनसेल आजियाटा लिमिटेड टाइटल स्पोन्सर बनेको छ। नेपाल स्पोर्ट्स एण्ड इभेन्ट म्यानेजमेन्ट (एनएसइएम) को आयोजनामा आगामी चैत १६ गतेदेखि सुरु हुने लिगका लागि एनसेलसँग सम्झौता भएको हो। शुक्रबार आयोजित एक कार्यक्रममार्फत नेपाल सुपर लिगकी प्रमुख आश्रयता कार्की चौधरी र एनसेलका चिफ कमर्सियल अफिसर उमेर मोहसिनले सम्झौतापत्रमा हस्ताक्षर गरेका थिए। यद्यपि, प्रायोजन रकम भने खुलाइएको छैन।
तेस्रो संस्करणमा सात टोलीले मात्र प्रतिस्पर्धा गर्नेछन्। यस पटक काठमाडौं रेजर्स, ललितपुर सिटी एफसी, झापा एफसी, एफसी चितवन, पोखरा थन्डर्स एफसी, बुटवल लुम्बिनी एफसी र धनगढी एफसी मात्र सहभागी हुनेछन् भने वीरगञ्ज युनाइटेड एफसी र स्पोर्टिङ इलाम डे मेची एफसीले भने सहभागिता जनाउने छैनन्। ‘ए’ र ‘बी’ क्याटगोरीका खेलाडीको अक्सन सम्पन्न भइसकेको छ भने ‘सी’ क्याटगोरीको ड्राफ्ट चाँडै गरिनेछ। एनएसएलका म्यानेजिङ डाइरेक्टर श्रेयांस कार्कीले एनसेलसँगको साझेदारीले नेपाली फुटबललाई नयाँ उचाइमा पुर्याउने विश्वास व्यक्त गरेका छन्।
