सहवित्तीयकरणमा प्रमुख बैंकहरूको सहकार्य, कालीगण्डकी गर्ज जलविद्युत आयोजनामा ७५ प्रतिशत ऋण लगानी

काठमाडौं । लक्ष्मी सन्राइज बैंकको नेतृत्वमा सहवित्तीयकरणमा सहभागी बैंकहरू र कालीगण्डकी गर्ज हाइड्रोपावरबीच १८० मेगावाट क्षमताको कालीगण्डकी गर्ज जलविद्युत् आयोजनामा लगानी गर्ने सम्झौता सम्पन्न भएको छ। मुस्ताङ र म्याग्दी जिल्लामा कालीगण्डकी नदीमा निर्माण हुन लागेको यस परियोजनाको कुल लागत रु. ३९ अर्ब ५० करोड २४ लाख रहेको छ। परियोजनाका लागि आवश्यक रकममध्ये ७५ प्रतिशत सहवित्तीयकरणमार्फत विभिन्न बैंकहरूले लगानी गर्नेछन् भने बाँकी २५ प्रतिशत लगानी कम्पनीका प्रवर्द्धक र सर्वसाधारणबाट जुटाइनेछ। लक्ष्मी सन्राइज बैंकको नेतृत्वमा ग्लोबल आइएमई बैंक, सिद्धार्थ बैंक, हिमालयन बैंक, नेपाल एस.बी.आई. बैंक, र एभरेष्ट बैंकले गरी कूल रु. २९ अर्ब ६२ करोड ६० लाख लगानी गर्ने सहमति जनाएका छन्।

कालीगण्डकी गर्ज जलविद्युत् आयोजनाले २०७५ फागुन २७ मा विद्युत् उत्पादनको अनुमति लिएको थियो भने २०७९ फागुन १७ मा नेपाल विद्युत् प्राधिकरणसँग विद्युत् खरिद बिक्री सम्झौता गरिसकेको छ। संघई ग्रुप, विशाल ग्रुप, तथा ज्ञानेन्द्र लाल प्रधान यस आयोजनाका मुख्य प्रवर्द्धक हुन्। सन् २०२९ भित्र निर्माण सम्पन्न भई वार्षिक करिब १०५६ गिगावाट-आवर ऊर्जा उत्पादन गर्ने लक्ष्य रहेको यस आयोजना नेपालका स्वतन्त्र ऊर्जा उत्पादकमध्ये ठुलो परियोजना हुने अपेक्षा गरिएको छ। उत्पादन भएको विद्युत् राष्ट्रिय प्रसारण लाइनमा जोडिनेछ, जसले नेपालको नविकरणीय ऊर्जा क्षेत्रमा महत्वपूर्ण योगदान पुर्याउनेछ।