काठमाडौँ । नेपालको पुरुष यू–१९ क्रिकेट टोलीले अफगानिस्तान यू–१९ सँग ५० ओभरको तीन खेलको शृंखला खेल्ने भएकोछ। नेपाल क्रिकेट संघ (क्यान) ले मंगलबार जनाएअनुसार मूलपानी क्रिकेट मैदानमा अप्रिल ३, ६ र ९ मा यो खेल हुनेछ।
दुवै टोलीले यो खेल आईसीसी यू–१९ विश्वकप एसिया छनोटको तयारीका क्रममा खेल्नेछ । नेपालले नै आईसीसी यू–१९ विश्वकप एसिया छनोटको आयोजना गर्दै छ ।
प्रतियोगिता अप्रिल १२ देखि २१ सम्म हुनेछ । नेपाल र अफगानिस्तानसहित हङकङ, यूएई र ओमानले प्रतिस्पर्धा गर्नेछन्। छनोट चरणको विजेता टोली सन् २०२६ मा जिम्बावे र नामिबियामा हुने आईसीसी यू–१९ विश्वकपमा पुग्नेछ।
