काठमाडौँ । पियोर इनर्जी लिमिटेडले चैत २८ गतेदेखि सर्वसाधारणका लागि आईपीओ निष्काशन गर्ने भएको छ। यसअघि आयोजना प्रभावित क्षेत्रका स्थानिय बासिन्दा तथा वैदेशिक रोजगारीमा रहेका नेपालीहरूका लागि निष्काशन गरिएको आईपीओ बाँडफाँट भइसकेपछि अब सर्वसाधारणलाई जारी गर्न लागिएको हो। कम्पनीले प्रतिकित्ता १०० रुपैयाँ अंकित मूल्यका ११ लाख ९५ हजार २०० कित्ता शेयर (जम्मा ११ करोड ९५ लाख २० हजार रुपैयाँ बराबर) निष्काशन गर्दैछ। ८० करोड रुपैयाँ जारी पूँजीको २ प्रतिशत अर्थात १ लाख ६० हजार कित्ता आयोजना प्रभावित बासिन्दाका लागि र १ लाख ४४ हजार कित्ता वैदेशिक रोजगारमा रहेका नेपालीका लागि छुट्याई बाँडफाँट गरिसकिएको छ। त्यस्तै, सामूहिक लगानी कोषलाई ७२ हजार कित्ता र कर्मचारीलाई २८ हजार ८०० कित्ता छुट्याइएको छ। सर्वसाधारणले न्यूनतम १० कित्तादेखि अधिकतम १ लाख कित्तासम्म आवेदन दिन सक्नेछन्।
निष्काशन बन्द हुने मिति छिटोमा २०८२ बैशाख २ गते र ढिलोमा बैशाख ११ गते हुनेछ। केयर रेटिङ्ग नेपालले कम्पनीलाई 'केयर एनपी डबल बी प्लस इस्यूअर रेटिङ्ग' प्रदान गरेको छ, जसले औसत जोखिम रहेको संकेत गर्दछ। कम्पनीले प्रवर्द्धन गरेको १० मेगावाट क्षमताका दुई सौर्य पि.भि. विद्युत आयोजना क्रमशः १ अर्ब २५ करोड ४७ लाख र १ अर्ब १७ करोड ६ लाख रुपैयाँ लागतमा निर्माण भइरहेको छ, जसको विद्युत उत्पादन अनुमति अवधि २० वर्ष ११ महिना बाँकी छ। यी आयोजनाहरूको साधारण लगानी फिर्ता अवधि ८.१२ वर्ष र डिस्काउन्टमा लगानी फिर्ता अवधि १२.४२ वर्ष रहेको छ। कम्पनीको आईपीओ निष्काशन तथा बिक्री प्रबन्धक नबिल इन्भेष्टमेन्ट बैंकिङ्ग लिमिटेड रहेको छ। लगानीकर्ताहरूले नेपाल धितोपत्र बोर्डबाट स्वीकृति प्राप्त सि आस्बा सदस्य बैंक तथा वित्तीय संस्था, तिनका शाखाहरू र ‘मेरो शेयर’ अनलाइन सफ्टवेयरमार्फत आवेदन दिन सक्नेछन्।
