काठमाडौं । नेपाल धितोपत्र बोर्डले दुई वाणिज्य बैंकलाई ७ अर्ब ५० करोड रुपैयाँबराबरको ऋणपत्र निष्कासन गर्ने अनुमति दिएको छ। अनुमति पाउने बैंकहरूमा एनआईसी एसिया बैंक र राष्ट्रिय वाणिज्य बैंक छन्।
एनआईसी एसिया बैंकले ‘एनआईसी डिबेन्चर’ नामक ऋणपत्र जारी गर्नेछ, जसको कुल परिमाण ५ अर्ब रुपैयाँ रहेको छ। यस अन्तर्गत १ हजार रुपैयाँ अंकित दरका ५० लाख इकाइ ऋणपत्र जारी गरिनेछ। जसमा ३० लाख इकाइ व्यक्तिगत तबरबाट र २० लाख इकाइ सार्वजनिक निष्कासनमार्फत बिक्री गरिनेछ। १० वर्षे अवधिको यस ऋणपत्रमा लगानीकर्ताले वार्षिक ७ प्रतिशत ब्याज पाउनेछन्। यस ऋणपत्रको बिक्री प्रबन्धक प्रभु क्यापिटल रहेको छ।
त्यस्तै, राष्ट्रिय वाणिज्य बैंकले ‘आरबीबीएल डिबेन्चर’ नामक ऋणपत्र ल्याउनेछ, जसको परिमाण २ अर्ब ५० करोड रुपैयाँ हुनेछ। बैंकले १ हजार रुपैयाँ अंकित दरका २५ लाख इकाइ ऋणपत्र जारी गर्नेछ। जसमा १५ लाख इकाइ व्यक्तिगत तबरबाट र १० लाख इकाइ सार्वजनिक निष्कासनमार्फत बिक्री गरिनेछ। ७ वर्षे अवधिको यस ऋणपत्रमा पनि लगानीकर्ताले वार्षिक ७ प्रतिशत ब्याज पाउनेछन्। यस ऋणपत्रको बिक्री प्रबन्धक सानिमा क्यापिटल रहेको छ।
