काठमाडौं । सर्वोच्च अदालतले ताप्लेजुङको पाथीभरामा केबलकार निर्माण लगायतका कार्यहरू तत्काल यथास्थितिमा राख्न आदेश दिएको छ। सरकार र निर्माण कम्पनीलाई अल्पकालीन अन्तरिम आदेश जारी गर्दै अदालतले प्रगति रोक्न निर्देशन दिएको हो।
याम बहादुर लिम्बु र अन्यले निर्माण कार्य बदरको माग गर्दै दायर गरेको रिट निवेदनको प्रारम्भिक सुनुवाइपछि अदालतले निर्माण कार्यको स्थिति परिवर्तन नगर्न आदेश दिएको हो।
गत बुधबार न्यायाधीश शारंगा सुवेदीको इजलासले चैत २६ गते छलफलका लागि दुवै पक्षलाई अदालतमा उपस्थित हुन निर्देशन दिएको छ। छलफलपछि मात्र अन्तिम निर्णय हुने सर्वोच्चको आदेशमा उल्लेख छ।
