काठमाडौँ । काठमाडौं जिल्ला प्रशासन कार्यालयले लगाएको कर्फ्यु आज (शनिवार) बिहान ७ बजेबाट हटेसँगै काठमाडौं उपत्यकाको जनजीवन क्रमशः सामान्य बन्दै गएको छ। शुक्रबार दिउँसोदेखि राति १० बजेसम्मका लागि लगाइएको कर्फ्यु प्रशासनले थप्दै शनिबार बिहान ७ बजेसम्म लम्ब्याएको थियो। कर्फ्यु आदेश अन्तर्गत बानेश्वर-तिनकुने क्षेत्र मात्र नभई गौशाला हुँदै कोटेश्वर, जडिबुटी र बालकुमारी पुलसम्मका क्षेत्रमा निषेधाज्ञा लागू गरिएको थियो।
सो क्षेत्रमा आवागमन, भेला, जुलुस, प्रदर्शन, सभा, बैठक तथा घेराउ पूर्ण रूपमा प्रतिबन्ध गरिएको थियो। राजसंस्थाको समर्थनमा प्रदर्शन भइरहेका बेला केही प्रदर्शनकारीले उग्र रूप लिँदै तोडफोड र आगजनी गरेपछि प्रशासनले कर्फ्यु आदेश जारी गरेको थियो। कर्फ्यु हटेसँगै आज बिहानदेखि जनजीवन सामान्य बन्दै गएको छ।
