काठमाडौं । भिजन इनर्जी एण्ड पावर लिमिटेड र नागरिक लगानी कोष (सीआईटी) बीच शेयर अण्डरराईटिङ सम्झौता सम्पन्न भएको छ।सम्झौतामा भिजन इनर्जीको तर्फबाट अध्यक्ष टिएन आचार्य र सीआईटीको तर्फबाट कार्यकारी निर्देशक पर्वत कुमार कार्कीले हस्ताक्षर गरेका छन्। सम्झौता अनुसार कम्पनीले शेयर निष्काशन गर्दा सीआईटी प्रत्याभूतिकर्ता रहनेछ। यदि कम्पनीले निष्काशन गर्ने शेयर बिक्री नभएमा सीआईटीले ती शेयर खरिद गर्नेछ।
भिजन इनर्जीले प्रति कित्ता १०० रुपैयाँ अंकित दरका कुल ६५ लाख कित्ता (६५ करोड रुपैयाँ बराबर) साधारण सेयर जारी गर्ने तयारी गरेको छ। यसका लागि कम्पनीले एनआईबिएल एस क्यापिटललाई बिक्री प्रबन्धक नियुक्त गरिसकेको छ। कम्पनीले हाल रामेछापको उमाकुण्ड गाउँपालिका–१ मा नुप्चे खोलाको पानी प्रयोग गरी ५७.५ मेगावाट क्षमताको नुप्चे लिखु जलविद्युत आयोजना निर्माण गरिरहेको छ। यस आयोजनामा सरकारी स्वामित्व रहेको एचआईडिसिएलको पनि लगानी रहेको छ।
