काठमाडौँ । नेपाल राष्ट्र बैंकले डिजिटल वित्तीय सेवाको प्रवर्द्धन तथा नवप्रवर्तनलाई प्रोत्साहित गर्न Digital Finance Innovation Hub स्थापना गरेको छ। बैंकको भुक्तानी प्रणाली विभागले उक्त हब सञ्चालनमा ल्याएको हो। राष्ट्र बैंकका अनुसार आधुनिक प्रविधिमा आधारित वित्तीय सेवाको विकासलाई सहज बनाउन तथा बैंकिङ तथा भुक्तानी प्रणालीमा नवीनता ल्याउन हब स्थापना गरिएको हो।
यस हबमार्फत वित्तीय नवप्रवर्तकहरूलाई विद्यमान नीतिगत तथा नियामकीय व्यवस्था सम्बन्धी जानकारी दिने, नवप्रवर्तनकारी प्रस्तावहरूको विश्लेषण गर्ने, अवसर र चुनौतीहरूको मूल्यांकन गर्दै नियामकीय दृष्टिकोण, Non-Binding Guidance, परामर्श तथा सुझाव प्रदान गर्ने व्यवस्था गरिएको छ। नवप्रवर्तनलाई थप प्रोत्साहन गर्न अन्य नियामक निकाय, सरोकारवाला संस्था तथा निजी क्षेत्रको समेत सहभागिता रहने गरी हब सञ्चालनमा ल्याइएको राष्ट्र बैंकले जनाएको छ।
