काठमाडौँ । चालु आर्थिक वर्षको पहिलो आठ महिनामा नेपालले बङ्गलादेशबाट दुई अर्ब ९६ करोड ९१ लाख ५२ हजार रुपैयाँ बराबरका सामग्री आयात गरेको छ, भने निर्यात भने निकै कम २७ करोड ६८ लाख ५४ हजार रुपैयाँमै सीमित भएको छ।
नेपाल पारवहन तथा गोदाम व्यवस्था कम्पनी लिमिटेड, काँकडभिट्टाका प्रमुख सुवास पाण्डेयका अनुसार बङ्गलादेशबाट सबैभन्दा धेरै अप्रशोधित जुट (१ अर्ब ६० करोड रुपैयाँ बराबर) आयात भएको छ। अन्य आयातमा ब्याट्री, पोल्ट्री फिड सप्लिमेन्ट, कस्मेटिक सामान, हाइड्रोजन प्याराअक्साइड, जुट यार्न, विद्युतीय उपकरण, औषधि, आलु, कागज, सिसा तथा खाद्य पदार्थ समावेश छन्।
यता, नेपालबाट बङ्गलादेश निर्यात हुने प्रमुख वस्तु खुदो (२३ करोड ६२ लाख ५८ हजार रुपैयाँ) रहेको छ। साथै, समीक्षा अवधिमा नेपालले जडीबुटी, घरायसी सामग्री तथा पशु आहार पनि बङ्गलादेश निर्यात गरेको छ। बढ्दो व्यापार घाटप्रति चिन्ता व्यक्त गर्दै प्रमुख पाण्डेयले बिजुली निर्यातमार्फत सो अन्तर परिपूर्ति गर्न सकिने बताएका छन्।
