काठमाडौँ। ग्रीन डेभलपमेन्ट बैंक लिमिटेडको लाभांश सुरक्षित गर्ने आज (चैत १४ गते) बिहीबार अन्तिम दिन रहेको छ, किनभने बैंकले साधारण सभा तथा लाभांश वितरण प्रयोजनार्थ भोली (चैत १५ गते) एक दिनका लागि बुकक्लोज गर्दैछ। आजसम्म नेप्सेमा कारोबार भई कायम भएका शेयरधनीहरुले बैंकको साधारण सभामा सहभागिता जनाउन र लाभांश प्राप्त गर्न सक्नेछन्।
बैंकले चैत २७ गते बिहान ११ बजे होटल पिस प्यालेस, हरि शंकर रोड, बाग्लुङ्ग नगरपालिका–२ मा बाह्रौँ वार्षिक साधारण सभा बोलाएको छ, जसमा हाल कायम चुक्ता पूँजीको ५.७५ प्रतिशत बोनस शेयर र कर प्रयोजनार्थ ०.३०२७ प्रतिशत नगद लाभांश वितरण गर्ने प्रस्ताव पारित गरिनेछ। साथै, बोनस शेयर वितरणपश्चात कायम चुक्ता पूँजीको १ बराबर १.१०७१ प्रतिशतका दरले हकप्रद शेयर जारी गर्ने, प्रबन्धपत्र तथा नियमावली संशोधन गर्ने, उपयुक्त बैंक तथा वित्तीय संस्थाहरूसँग मर्जर वा एक्विजिशन गर्न सञ्चालक समितिलाई अख्तियारी दिने, सर्वसाधारण शेयरधनीहरुको तर्फबाट दुई जना सञ्चालक चयन गर्ने र लेखापरीक्षक नियुक्त गर्ने प्रस्तावहरू पनि पारित गरिनेछ।
